1 Corinthians 1

1Na Pol. God nomane pai mal pille une na dje worika na Krais Jisas aposelye moro. Ye God kandjiye pillgi djinj una dumo Korin mor ge, ne una nono Iwa Kerman Jisas Krais pille pla ye, une pille yau to mor una porapora dumo yemyem moye ge, Krais Jisas yeika ye yene unakye kaima molo, djengimb ta namoro mal mor. Mor ge yene nono Iwa Kerman molo, kambono Iwa Kerman molo embe yendo. Yendo ge agane Sostenes na boll pepa bolo ye aunmoll.

3Nono Nane God ne, nono Iwa Kerman Jisas Krais ye wandill golo aumbellka, ye ellne tukne arngan yenda molme!

Pol wopake we dje God aundo

4Ye Krais boll mor ge God ye wandill golo awi una mor. Une embe yei ge pille na ye ege ege wopake we dje God moro al aundo. 5Ge God ye wal porapora awi, ye ye mor. Ye kandja paro mal dje, wal merke pille kane yenj. 6God ye wal porapora awi ye ye mor al ge, nono kanmon, na Krais kandjiye dje ye awill mal ge kandja kaima pai. 7Embe yei ge, nono Iwa Kerman Jisas Krais er yem wonda dje pille tau ye mor al ge, God Murble wal wopake awi ye i pora dji, kune yei. 8Nono Iwa Kerman Jisas Krais yene ye wordaka ye aglo gi dje pa moye. Une yem wo kot djinda poke ge, ye wambo napanda, ye kiwa moye. 9God moro ge une ye dje i worika, ye yene wariye nono Iwa Kerman Jisas Krais moro ge ye wo une boll mor. Alla God moro ge, une kandja djindo mal eri yendo pille, une kandja embe dji ge kaima panda, kot djinda poke ge, ye kiwa moye.

Pillgi dji una moi ge nomane djelldjell yei

10Agana kambono ye porapora mor ge, nono Iwa Kerman Jisas Krais kandjiye al ge na kandja dongall dje ye aundo. Ye nonga dje, djelldjell molo yenj ge kerme! Ye kandja taimane dje, nomane taimane panda moye. 11Agana kambono, ye nonga dje embe yenj ge, ana Klowe epilye kambono kane wo na dje awi pill. 12Na kandja embe djindo ge, ye una mor al una pende kandja embe dji, no Pol wombaye mormon we djimaka, pende no Apolos wombaye mormon we djimaka, pende no Pita wombaye mormon we djimaka, pende no Krais wombaye mormon we djimaka embe yenj. 13Ba alla Krais nono tokall to i djelldjell naworbon. Man. Mo, Pol ipo iko pera al ye pille nil tomaka pai mo? Mo, ye nu pai ge, ye nanam kandjina al pille pai mo? Ge man! 14Na ye mor al una merke ipo nu pagle nawill ge, na wopake we dje God aundo. Iwa soka Krispus ne Gaius mopill ge na nu pagle awill, una ta man. 15Embe yell ge, una kandja dje, no nu papin ge Pol kandjiye al pille nu papin we djine ge, ale panda. 16Alla ta yell ge, iwa Stepanas yene game wombaye boll na nu pagle awill eri. Ba alla, una ta na nu pagle awill mo nawill ge, na napro. 17Krais na dje wori woll ge, une na po una nu pagle auno dje pille na dje wori nawoll, man. Une na dje wori woll ge, yene kandjiyembe wopake na po una dje auno dje pille dje wori woll. Na kandjambe wopake ye boll djino ge makimb una nomane kerman paraka kandja wopake wopake djinj mal ge na nadjino. Na kandja embe djill dal, Krais iko pera al goi ge una wal kiwa mal embe piye.

Krais moro ge God yembe dongall pai mal embe moro

18Ge Krais iko pera al goi we dje kandja embe djinmon ge, er take dje po mor una embe dje kaninj, ge dall kandja djinj dje kaninj. Ba alla, God nono i yem dji mormon ge, nono embe dje kanmon, kandja paro ge God yembe paro mal embe paro we dje kanmon. 19Ge kandja Baibel al bolo wori paro ge embe mal paro,

Nomane momo paro una kandja djinj ge na to worno. Alla, nomane kerman pai una kandja djinj mal ge, na para to kal woro kerno we dji.

(Aisaia 29.14)

20God kandja embe dji pille, ga kandja djine mal ge dall kandja kaima paro dje kanbon. Nomane momo paro una ge djine kune nayenda. Mosis loye dje dje yei una mor ge djine kune nayenda. Una kerman kandja dongall djine ge kune nayenda mal paro. 21Ge God yene nomane wopake pai al embe dje kani, makimb una yenekne nomane kerman panda mal, ga nanam kanpol tane naparo dje kani. Kambono une moya al wone naparo dje kane, une kondwe djell ta ye pagle embe dji, nanam kandjina ge makimb una kane dall kandja paro dje kanne ba alla, na yenaka, una ye molo dall kandja ge pillgi dji dal, na wo pille i yem worno we dji. 22Ge Juda una kandja embe djinj, ye kandja embe djinj ba alla ye wal dongall ta aike nayei dal, ye kandja djine ge kandja kende djinj dje pupon we djinj. Alla Grik una kandja embe djinj, makimb una kandja djinj ge ta mal djine, ye kandja djinj ge dall kandja djinj we djine. 23Ge pille, una wo Krais ipo iko pera al to goi we djinmon al ge Juda una pille ke pi alla, Grik una ge kandja dall kandja djinj dje kani. 24Ba alla God kandjiye ge kandja dall paro we djinj ge kune nayendo. God kandja dall kandja djindo ge yembe ye molo, makimb una kandja djinj mal ge kamblo aundo. Alla God yembe dongall naparo we djinj ge kune nayendo. God yembe napai ge yene yembe ye molo makimb una yembene paro mal ge kamblo aundo. Kambono kandja embe djinj ba alla, God nono dje i una mormon ge, nono Juda una ne Grik una mormon ge, Krais yeika God yembe dongall paro ge nono boll paro. Alla Krais yeika, God Murble nono boll moro.

26Agana kambono, ye kaninj. God ye dje i kune, makimb una nalene al, ye moi al nomane kerman pai una namor dje kani. Ye merke moi ge yembene napai, ye epline kandjine napai dje kani. 27Ba, God dje inda una moye ge, makimb una kane embe djine, ge una dall mor. Ge una yembene napai una mor we djine. Ba alla God una dje ido ge, una nomane kerman pai una yenekne kane ngadill goye dje pille dje ido. Yembe paro una yenekne kane ngadill goye dje pille una ge dje ido. 28God dje inda una moye ge, makimb una kane ke kanne. Makimb una kerman ne ngambalne pai una mor ge, God amblo kal worno dje pille una kurull tom mor ge dje ido. 29God embe yendo pille, nono kuruwo kama porapora mormon ge, yene nale al nonekne kandjine amblo pla worbon ge kondwe nayenda. 30God embe yei al ge, ye Krais Jisas boll aike mor. Krais kogo yei al ge God nomane kerman pai ge nono boll paro, nono God nale al kiwa molo, Krais unakye kaima molo, God nono top to i yem wori mormon. God embe yei ge pille, ye Baibel kandja djindo mal yene. Baibel kandja embe djindo,

ye yenekne kandjine amblo pla naworne, man. Iwa Kerman kogo yendo mal pille ye une kandjiye amblo pla worne.
31

(Jeremaia 9:24)